Espetxeaz besteko aukerak

Espetxeaz besteko aukeretara zer kasutan jo daitekeen.

Indarrean dagoen legedi penalak eta espetxeetako legediak gai honen inguruan arautzen dutenaren arabera, Epaile eta Auzitegiek espetxea ez den bestelako aukeretara jo eta beste moduko neurri batzuk ezar diezazkiekete drogarekiko atxikimendua duten pertsonei:

• Batetik, delitua egiten duen pertsona erantzukizun penaletik salbuetsia izan daiteke delitua egiteko unean intoxikazio-egoera osoan baldin badago -alegia, alkohola, drogak, estupefazienteak hartu izanagatik-, edota atzeraldi-sindromearen ondorioak baldin baditu (Kode Penalaren 20.2 artikulua). Kasu horietan epaileak, segurtasun-neurri gisa, pertsona hori drogazaletasuna kentzeko zentro batean sartzeko agindua eman dezake, delituaren erantzule deklaratuko balute betetzea legokiokeen espetxeratze zigorrak iraungo lukeen denbora-bitarterako gehienez ere (Kode Penalaren 102. artikulua).



• Gerta liteke ere, bestalde, intoxikazio-egoerak erantzukizun osoaz ez salbuestea delitugilea (Kode Penalaren 21.1 artikulua), eta halakoetan epaileak hura bi zentrotan sartzea erabaki dezake: alegia, espetxean, denboraldi batez, eta drogazaletasuna kentzeko zentroan, beste batez.



• Azkenik, 88. artikuluak, oro har, espetxe-zigorraren ordezko neurriak arautzen ditu. Artikulu horren arabera, delitugile ez ohikoen kasuan beste zigor-mota batzuk jar daitezke espetxe-zigorraren ordez (bi urterainoko espetxe-zigorraren ordez gehienez), baldin eta espetxeratze-zigorrak prebentzio eta gizarteratze helburuak galaraz ditzakeela uste bada. Asteburuko atxilozeak, isunak edo erkidegoaren aldeko lanak dira espetxe-zigorraren ordezko gisa aurreikusten diren neurriak.

Askatasunaz gabetzeko zigorra betetzeko modu bereziak

Presondegi-erregimenak espetxe-zigorrak betearazteko modu bereziak hartzen ditu kontuan. Horietako batzuk espetxeratze-zigor arruntaren ordezkoak izan daitezke preso drogazaleen kasuan. Hona zein diren: gizarteratze zentroak (163-164. artikuluak), mendekotasun-unitateak (165. artikulua) eta espetxeaz kanpoko unitateak (182. artikulua). Unitate horiek, oro har, espetxeko hirugarren gradua duten presoentzat eta asteburuan atxiloturik egotera zigortuta daudenentzat izaten dira, eta guztien helburua presoa gizarteratzea lortzea da.

espetxeratuak > araudia > aukerak