Kannabisari buruzko eztabaida

Drogak legez kanpo utzi edo ez utzi eztabaidagai den bitartean, ugaltzen ari dira kannabisaren gaitasun terapeutikoei buruzko ikerlanak. Dirudienez, kannabisaren ahalmen terapeutikoa ukaezina da: goragaleak eta estuasuna kentzen ditu (eta horiek sintoma arruntak dira minbizia edo HIESaren aurkako tratamenduetan), mina arintzen du, jateko gogoa handitzen du anorexia kasuetan, eta abar. Kannabisaren defendatzaileek diote ez dela kannabisaren kontsumoak eragindako heriotza-kasu bakar bat ere ezagutzen. Kannabisaren aurkakoek berriz, gai honen kontsumoa luzatuz gero gorabehera psikologiko handiak sor daitezkeela diote, eta mendekotasun-sindromea sortu.

Garrantzi handiko eztabaidagaia da, kannabisa baita EAEn gehien kontsumitzen den legez kanpoko droga, eta kontsumitzaile-kopuruak ere gora egin duelako 1990ko hamarraldian, Europako gainerako herrialdeetan bezala, bestalde. Biztanleriaren %25ak behin edo behin kontsumitu duela dio, eta %14 ohiko kontsumitzailea dela. Kannabis-kontsumoak gora egin du nerabe eta gazteen artean, eta %30k maiztasunez kontsumitzen duela dio.

Droga-mendekotasunen Euskal Behatokiak 2000. urtean egindako inkesta baten arabera, EAEko herritarrak, oro har, marihuana legeztatzearen alde daude, kontra baino gehiago. Dena dela, alde daudenen kopuruak ez du gora egin azkeneko urteotan..

legalizazioa > ondorioak eta arriskuak > Cannabisaren legeztatzea